ნავთობისა და გაზის საერთაშორისო ხელშეკრულებებით გათვალისწინებული რამდენიმე სტანდარტი

ანოტაცია

სხვადასხვა ინდუსტრიაში არსებული ხელშეკრულებები, როგორც წესი, ითვალისწინებენ ერთგავროვანი სპეციფიკური დებულებების არსებობას,რაც მრავალწლიანი პრაქტიკის შედეგად არის დამკვიდრებული. ამ მიმართულებით არც ნავთობისა და გაზის ტრანსსასაზღვრო გადაზიდვის პროექტის ხელშეკრულებებია გამონაკლისი. ისინი ისეთ სპეციფიკურ დებულებებს ითვალისწინებენ, როგორიც არის გარემოს დაცვითი, ტექნიკური, სოციალური, შრომითი, ადამიანის უფლებათა, ჯანმრთელობის დაცვის, უსაფრთხოების, ბუღალტრული აღრიცხვის და სადაზღვევო სტანდარტები. ცხადია, აღნიშნული ჩამონათვალი შესაძლოა სხვა ინდუსტრიისთვისაც იყოს დამახასიათებელი (მაგალითად მსხვილი ინფრასტრუქტურული პროექტის ხელშეკრულებები და სხვა), ვინაიდან მათი უმეტესობა, თავისი შინაარსით, უნივერსალური მნიშვნელობის მქონეა. განსახილველი სტანდარტების მიზნია, რომ ნავთობისა და გაზის საერთაშორისო გადაზიდვები განხორციელდეს უფრო უსაფრთხო და ყველასათვის მისაღები ფორმით და დაცულ იქნას, როგორც შესაბამისი ტერიტორიის მფლობელი ქვეყნის, აგრეთვე პროექტში ჩართულ ინვესტორთა და მესამე პირთა ინტერესები.